الخميس، 26 يونيو، 2008

قطوة

امس كنت بدار الوالدة وفتحت الستارة ولا هاللي منسدحه على الدريشة
عاد ماهانت علي قلت لازم اجكها بصورة
تصدقون مستانسة على الفلاشات لووول

Cartier Leve Praclet

اطلقت Cartier مبادرتها الخيرية في الكويت وتعود هذه الحملة بتبرع كبير لجمعية الكويت لرعاية الاطفال بالمستشفيات
من خلال طرح سوار الحب الخيري
ويتكون السوار من حلقتين صغيرتين احداها من الذهب الاصفر والاخرى من الذهب الابيض عيار 18 قيراط معلقين بسوار من الخيوط الحريرية
ويبلغ ثمنة 295 دك

الاثنين، 23 يونيو، 2008

ONE USA CENT

اليوم كنت رايحه مركز سلطان وانا نازلة من السيارة شفت تحتي شي
وتفاجأت انها One Cent امريكية
خذيتها ذكــرى وقلت اراويكم اياها
لوول رايحه فيها من الغبار والرطوبة

new Hardees Branch in Hawally

فرع يديد لهارديز في حولي .. شارع بن خلدون

الجمعة، 20 يونيو، 2008

Braclet

واخيرا وصل سواري اللي طالبته من كات ووك الافنيوز
وايد بنات سألوني عن مكان المحل بالافنيوز وقالوا بالغصب لقوووه
هذا المحل تحصلونه بصفة برووي
وعلى فكرة فيه له فرع بالمطار مقابل جاشنمال

انتقل الى رحمة الله الهاندفري

امس وانا بالسيارة رن موبايلي وقعدت ادور الهاند فري علشان نفتك من الشرطة لول
وانا ادور بالجنطة ولا لقيت الهاند الفري جذي

ولما رديت البيت ولا متقطع الهاند فري لي 3 قطع لوول .. انتقل الى رحمة الله الهاند فري وليلحين ماني عارفة شنو السبب :(

الأربعاء، 18 يونيو، 2008

Marble Slab Creamery

تم افتتاح اول فرع لأيس كريم «ماربل سلاب كريمري» في مجمع الكوت
وهو ايس كريم امريكي ..شعارة الآيس كريم الوحيد في العالم الذي يقدّم طازجاً


الصور من جريدة الراي العام

الاثنين، 16 يونيو، 2008

LUBEX Car Xpress Services

خدمة يديدة في الكويت
سيرفس للسيارة وانت بالبيت
خوش شي خصوصا للبنات :)

السايت

ViLLa Moda 50% Sale

ViLLa Moda 50% Sale

بدت تنزيلات فيلا مودا يوم السبت اللي طاف
وكالعاده اكيد الزحمة والقمته المسيطرة على المكان في الشويخ
هالسنة مارحت ولا عورت راسي
لاتنظيم وساعات على مايوصل الدور للكاشير
احط فلوسي بالشمس واقعد بالظلال احسن لي من هالزحمة واللوية
وعليهم بالعافية اللي راحوا وتشروا :)
الصورة من بلوق

السبت، 14 يونيو، 2008

جوكو واكو

اليوم المغرب كان بخاطرنا ايس كريم وفكرنا نطلب من عالم المانجو لأول مره (خدمة التوصيل للمنازل)
وبعد تفكير في المنيووو قلت بجرب جوكو واكو <-- اسم غريب عجيب لول
اهوو عبارة عن ايس كريم فانيلا وبراوني كيك ومكسرات وسوس شوكليت
طلبنا الساعه 6:10 تقريبا ووصلنا الطلب بسرعه عجيبة تقريبا ربع ساعه او ثلث ساعه
وكان مغلف بهالطريقة
وهذااا الايس كريم
الصراحه عجيب بس كبيييييير يكفي شخصين ويشبعون بعد
تجربة استحقت 90%

الاثنين، 9 يونيو، 2008

Good Morning

Cup of coffee
reading alwatan news paper

Mini Pancakes

رفيجتي بالدوام مدحت لي بان كيك يبيعونه في مركز سلطان
سهل التحضير بس تحطة في المايكرويف 30 ثانية ويكون جاهزززز
وقالت لي ان طعمه احلى من البانكيك اللي عند ماكدونالدز
اليوم كنت في مركز سلطان عاد تذكرت البان كيك ولقيته
خذيته مع السيرب
هذي العلبة بعد مافتحتها
وهني بعد ماحطيتها بالصحن
وهني بالمايكرويف .. 30 ثانية فقط .. ريحتها عجيبة
وهني جاهزة للأكل :)
بصراحه توقعتها احلى .. طعمها مر شوي
ماتستحق اكثر من 65%

السبت، 7 يونيو، 2008

برنامج حنين .. ماما أنيسة

وانا اقلب في القنوات يوم الثلاثاء الفائت استقريت على قناة الكويت الاولى لمشاهدة برنامج حنين
وماشدني للمتابعة هو استضافة ام الكويت (ماما انيسة)
برنامج حنين من تقديم الاعلامي القدير بدر بورسلي
بصراحه اللقاء كان ممتع وماما انيسة تكلمت بكل صراحه عن حياتها ومسيرتها في التلفزيون
واكشفت ان ولد اختها أحمد اهوو الولد اللي ماولدته واهوو اللي متربع في قلبها :)
سبحان الله ماما انيسة من الاشخاص النادرين في المجتمع واللي تدخل القلوب من غير استأذان
سبق اني ظهرت مع ماما انيسة في الثمانينات ببرنامج ماما انيسة والصغار في 3 حلقات
طبعا من حظي اني احتفظت في هالحلقات بأرشيفي المنزلي المصغر
ماما انيسة في الواقع نفسها ماما انيسة بالتلفزيون قمة الطيب والحنان :)
ماما انيسة الله يحفظج ويطول بعمرج .. انتي فعلا ام الكويت تستحقين هاللقب عن جدارة

مع الاسف ماعرف طريقة اضافة فيديو من اليوتيوب
بس هذا الرابط لبرنامج ماما انيسة والصغار :)
http://www.youtube.com/watch?v=f0k3Q-vhmkM

ASUS Eee PC

قبل فترة قريت عن لاب توب اسوس وعجبني ونزلوه يوريكا ورحت شفته لكن المواصفات حسيتها كلش مو شي فألغيت الفكره من بالي
لكن وانا احووس بالمواقع والبلوقات كل من يمدحه وشاريه وبعد ما اتصلت على احد محلات الكمبيوتر وطمني انه تحويله اكس بي سهل وياخذ يوم واحد فقط والبلوتوث وصلة يو اس بي وينتهي الموضوع
تشجعت وقلت اليوم اروح اشتريه
بعد ماوصلت يوريكا وسألتهم اكتشفت ان الكمية اللي يابتها يوريكا طاااااااارت بالكامل (مشاء الله كويتيين مايخلون شي)
عاد قلت ماكوو الا شارع بن خلدون ادور فيه
فأكتشفت محل BEST BUY
وحصلت عنده الاب توب ومن حظي انه فيه انواع منزلين فيهم ويندوز اكس بي الاصلي يعني ما يحتاج انطر بعد يوم علشان استلمة فخذيت اللون الابيض 4 قيقا ومعاه في الكرتون الجنطة والشاحن والبطارية طبعا
وبما ان عندي بالبيت وصلة بلوتوث .. ركبته بس ماصارله تعريف تلقائي لازم التعريف بالسيدي والجهاز مافيه سيدي درايف فأضظريت انقل السوفت وير الى هارد ديسك خارجي والحمدلله تثبت وشبكت :)
وهذي صفحتي في ال ASUS Eee PC قيمة الجهاز .. 149 دك
بيست باي
حولي .. شارع بن خلدون
تلفون 2643865

الجمعة، 6 يونيو، 2008

مخبز أمير الأمراء

امس مرينا على مخبز امير الامراء بحولي
رفيجتي مادحه الصمون الصغار اللي عندهم حق اليمعات والريوق حلوين
عاد قلت اروح اشوف
مشاء الله تبارك الرحمن من الزحمة تعرف ان المخبز ممتاز
دخلت ومن كثر الاشياء الحلوة مادري شآخذ
بما اني من عشاق الحليب فأول شي اخترت تشكيله من البقصم
لسان الثور (ساده)
لسان الثور (باليانسون)
بقصم حلو بالسمسم
بسكوت
جلاش بالجبن والزعتر .. وايد مالح تحسفت خذيته
وهذا الصمون الميني (الصغار)

وهذي النتيجه بعد اللبنه والجبن .. سويت شوي منه حق الريوووق


المخبز في حولي مقابل حولي بارك تقريبا وبجانب بانزين حولي

الثلاثاء، 3 يونيو، 2008

Casper & Gambini's Breakfast

اليوم طلبت ريوقي من Casper & Gambini's
وكان عبارة عن جبنة فيتا مع زيتون وخس وطماط في باجيت ابيض
مع سفن آب
الباجيت وايد لذيذة وكبيرة تشبع وتزيد بس الجبنه شوي تسحن الجبد ما يبيلها الا ماااااي باااااارد بعدهاا

الطلب وصل بعد ساعه تقريباً
المطعم يستحق التجربة :)

الاثنين، 2 يونيو، 2008

اجهزة يديدة


وأخيرا استلمت جهازي وبرنتري اليدد في الدوام

بنك الخليج التعيس

بنك الخليج اممممممم هذا اللي بتكلم عنه اليوم وبطلع اللي بقلبي كله

اللي قري مدونتي اللي امس راح يعرف سالفة روحتي للبنك

دخلت الفرع التعيس اللي في بيان وقعدت انطر الاخت الموظفة المحترمة تكلمني وتعطيني ويهه
مادري ليش كاشته بالحريم والرياييل تمشيهم بسرعه !!!!!
والمشكله لا ارقام ولا شي فوضى والمكان صغيـــــــــــر
الحمدلله انقذتني موظفة ثانية من لوعة الجبد وفهمت مني السالفة كلهااا اقصد طبعا سالفة الكي نت والمبلغ اللي تعلق بيني وبين المحل
اظطرت تنادي م. المدير علشان يفهمها تسوي المعاملة لأنها اول مره تسوي هالشي وهذا أخرني زيادة ولله الحمد بعد عناء سوت الشكوى اللي على الكي نت وخلصناااا
معاملتي الثانية ان الالكترون كارد مخلص من شهر 6 وانا رحت لهم اخر 6 قالوا ما وصلوا الكروت واذا وصلوا ندق عليج
طبعا لا دقوا ولا شي وانا انشغلت وما رحت ولما صارت سالفة الكي نت قلت يالله زلقة بطيحه واتفاجأ ان حتى الكرت موموجود ولازم تسوي معاملة يديده تطلب فيها كرت يديد وبعد يومين الاستلام

بإختصار بنك الخليج تعيــــــــس
أفكر بجدية اني احول راتبي بنك ثاني
قاعده افكر بالبنك الاهلي رفيجتي تشتغل هناك وعروضهم حلوة
انتوا شرايكم ؟

الأحد، 1 يونيو، 2008

VERSUS ويافرحه ماتمت

اخترت للوالدة بوك من فيرسس الافنيوز
لعيدميلادها اليوم
قلت بفرحها بشي بعد قلبي
لكن صار شي خرب علي :(
بما ان اول الشهر فالماستر كارد اهي اللي تصرف بهالفترة
بعد ماخترت الهدية وغلفوها وكل شي تمام
سحب الموظف في الكي نت وطلعت اول ورقة ابروفد لكن الورقة الثانية اللي للمحل ماطلعت اوكي لأنه الله يهديه مادري شضغط بالجهاز
وحاول كذا مره يسحب لكن يطلعله Declined
بعد مادقيت على البنك استفسر قالوا اهوو اول مره صارت ابروفد بس اللي بعدها لا
والحل ؟؟
لازم انطر 15 يوم علشان ترد الفلوس حق الاكاونت مره ثانية :(
وبما ان الفيزا مافيها وايد وكرتي الثاني مو معاي اجلت هدية الوالدة لليوم بالليل اذا الله راد
اكيد بسويلكم تحديث واقولكم شصار معاي

Cousin Birthday

اليوم زرقت شوي قبل لا اروح المستشفى للوالدة
مريت الافنيوز اخذ هدية لأمي بمناسبة عيدميلادها وهدية لبنت خالي علشان عيدميلادها ال 26 احم احم لوول اليوم بعد
دخلت محل كات ووك لأني كنت حاطة في بالي باخذ شي معين
كنت ابي هالاساور واركب عليها charm انا اختارة بكيفي
خذيت لها اللون البيج لأنها تعشق هاللون بملابسها :)
شوفوا الجارمااات يشوقون .. انا ركبت لها جارم على حرفها M
وهذي صورة من النت اوضح

وطبعا هدية ..فلازم تغليـــف
هدية بنت خالي بعد التغليف

اقولكم شي
انا بعد خذيت لي واحد واللون اكيد Pink
السوار قيمته 8 دك
اما الجارمات يختلف من واحد لي واحد كل شكل له سعر
هذا السايت لتفاصيل اكثر