الاثنين، 14 أبريل 2008

عــيد ميـلادي

اليوم 14/4/2008 عيد ميلادي :)

طبعا بما ان الوالدة ربي يحفظها ويشفيها ليلحين بالمستشفى فأكيد ما احتفلت مع بيتنا بهالمناسبة :(
بس يتني مسجاااات واااااااااايد من رفيجاتي واهلي الله يخليهم لي
و خواتي الصغار بعد قلبي ما قصروا لقيتهم حاطين على فراشي هالهدايا واكيد اهي فلووووس :)


وبنت خالي الحلوة ماقصرت يابت لي هالهدية الحلوة

ادري فيكم تبون تطلوووووون لووول شوفوا هداياي
هذا سيت للمكتب :)
وعطر VERSACE


وككاو PATCHI


وبعد قلبي صديقتي صافي زارت الوالدة بالمستشفى ويايبه معاها كيكة حلوة من ChOcOLaTe Bar
علشان عيد ميلادي :)



وهني بعد ما وزعناهااا


وانتهى يوم عيدميلادي قبل شوي لما دخل علينا يوم 15/4 :)

السبت، 12 أبريل 2008

سـرايات 11/4/2008

امس وانا قاعده عند الوالدة الله يحفظها ويشفيها في مستشفى الاميري سمعنا صووت مطر قوي
وقامت درايش المستشفى اتهزز ركضنا على الدرايش ولا نشوف العافووور اللي بره
يخررررع السيارات تهتز بالشارع
وبما ان الكاميرا على طول بالجنطة طلعتها وخذيت جم لقطة للحدث




كسرت خاطري الحمامة شوفوا وين انخشت .. وفي وحده ثانية عورت قلبي الظاهر حاشتها بردية وقامت تدور وطاحت وعليه :(


شوفوا الماي اللي بالشارع مشاء الله


ياجماعة لاتخلوووون دعاء الريح ترى في سراية ثانية اليوم
" اللهم اني اسألك خيرها وخير مافيها وخير ما ارسلت به واعوذ بك من شرها وشر مافيها وشر ما ارسلت به"

الاثنين، 7 أبريل 2008

عندليب الدقي

اليوم الظهر الوالدة كانت طالبة مني شوية اغراض وقلت خنروح مركز سلطان منها تمشي ومنها اخلص غريضات الوالدة

وهذي عرباتني بنص التسوق حسافة ماصورتها لما فووولت :(



قبل لا احاسب مريت صوب ارفف الاشرطة وحصلت فيلم عندليب الدقي اللي كنت انطرة من زمان ابي اشوف دور الفنان الكويتي داوود حسين فيه

وعلى طول بدون تفكير خمطت لي شرررريط :)


والعصر قلت يالله حان دور مشاهدة الفيلم

سكرت الليتات وبدااا الفيلم

وهذا مشهد من المشاهد اللي طلع فيها بوحسين


طبعا الفيلم مايحلى بدون الجـــاي وهالكيكة الطيبة


طبعا الفيلم مش ولابد يعني حليووو مو حلووووووو موت


قصته عن توأم فوزي وفواز

بإختصار اهم من ام مصرية واب خليجي ينفصلون ويتفقون ان كل واحد ياخذ ولد ففوزي ربته والدته في مصر وفواز رباه ابوه في دبي ولما كبروا محد يعرف الثاني

وقبل لا تتوفى الام اعترفت لفوزي عن حقيقته واخوووه وحاول فوزي الوصول لأخوه الثري بكذا طريقة ليما وصل له وكان الهندي اللي يشتغل عند ابوهم (داوود حسين) اهووو اللي يعرف الحقيقة وعرفهم على بعض وبعدها صارت احداث كثيرة اهمها ان بيستقلون فواز ليوقع على صفقة دوا مع الصهاينه والدنمركيين مقابل كوميشين لسكرتيرة فواز واحد العاملين عنده ورفض فواز هالشي فقاموا يخططون له واللي انقذة اكيد توأمه فوزي

مع الاسف دور الفنان داوود حسين كلش عادي وماله اثر كبير في سياق القصة لأن الدور الكبير اكيد لمحمد هنيدي كونه مثل شخصيتين (فواز وفوزي)



الي يحب يشوفة ترى لابأس فيه :)

الأحد، 6 أبريل 2008

2Day

اليوم الصبح زرقنــا من الدوام وقلنا نشرب شي في ستاربكس صفاة الغانم
الساعه 9 ونص فتح وكنااا من اول الداخلين
انطلقنا الى ستاربكس



طلبنا هوت جوكليت وكلاب ساندويتش



وبعدها خذينا لنا فره صوب الاثاث
وايد عجبتني هالقعده كلها كاملة تطلع ب 700 دك تقريبا


والحين انطلاقتنا كانت قسم الكاميرات
عندي كاميرا كانون 300D
وكان خاطري ب 400D لأن حجمها اصغر وهم وايد يمدحونها
وحاليا سعرها 289 دك
والحمدلله اني ضبطت نفسي وماخذيتها لأني مارديت البيت وكلمت وحده من رفيجاتي كان عندها خبر
ان كانون بتنزل بعد اسبوعين كاميرا 450D وطبعا راح تكون افضل من 400
فقلت خيرة يالله انطر شوراي
وهذي مقارنة بين 400 و 450 للي عندهم هواية التصوير الفوتوغرافي

ولمعلومات اكثر تفضلوا هالسايت

السبت، 5 أبريل 2008

مدرسات في حياتي







Teachers in My Life






من قعدت من النوم اليوم وانا افكر في مدرساتي من الروضة الى دكاترة الجامعه

وقلت فرصة اني اكتب عن مدرساتي اللي كان لهم اثر في حياتي وليلحين مانسيتهم

قم للمعلم وفّه التبجيلا ... كاد المعلم أن يكون رسولا

هالبيت الشعر كنه على ايامنا نطبقة لكن هالايام ما اشوف للمدرس هيبة مع الاسف

الطالبة تعامل المدرسة جنها وحده من ربعها لا احترام ولا تقدير

خلوني اذكر لكم بعض مدرساتي اللي ليلحين اتذكرهم واشيل لهم محبة بقلبي ماراح تروح ابدا


الروضة :

*ابلة نوال .. مدرسة موسيقى

هالمدرسة كانت ملح حصة الموسيقى كنت احبها وايد واحب الموسيقى
ابلة مصرية حنونة درستني ودرست اختي الي اصغر مني
لماا اشوف شريط حفلات الروضة واهي لامتني ولامه اخيتي تدمع عيني لما اتذكرها
ياترى وينج الحين يا ابلة نوال


* ابلة شيخه العبدالرزاق
قمة في الحنان والطيبة .. ليلحين اتذكر كانت تسويلنا فروت سالات وتييبها الروضة وياها تبلع فينا لول

* ابلة عواطف السعيد
ما اقدر اقول عنها الا انها اميمة حق كل ياهل بالروضة .. اهتمام وطيبة وحنان

في ابلات ثانين احبهم وايد بس نسيت اساميهم ومتذكرة اشكالهم :)


الإبتدائي :
* ابلة فاطمة .. لغة عربية
ياحلوووها هالابلة كانت حدها حبوبة واتذكر بعد الغزو الله لا يعودة كان زوجها اسير ما ادري اذا رجع مع اللي رجعوا ولا ليلحين مايدرون عنه :(
كان خطها تبارك الرحمن عجيييييييب وكانت تستانس علي لأن خطي حلووو وحتى لما بعد ماخلصت الابتدائي والمتوسط وامي كانت تروح تاخذ خواتي كانت تسأل عني فديتها

* ابلة سعاد حمادة .. تربية بدنية
اهي نفسها ام قوت القلوب اللي طلعت في ميشن فاشن .. كانت ابلة صارمة ودوم تدرب على الرقصات في الاعياد الوطنية بس كانت من المدرسات اللي ما انساهم


* ابلة بيبي حبيب .. تربية اسلامية
اهي ام المذيعه حليمة بولند .. انسانه طيبة وحبوبة ماتنسي ابدا .. لما ازور حلوووم اشوفهااااا :)

* ابلة منيرة خاجة .. لغة عربية
استانس عليها هالابلة وايد حبوبة وكانت تحبني مثل ما احبها :)

* ابلة آمنه خاجة .. رياضيات
اخت ابلة منيرة .. هم كانت حبوبة :)
* ابلة ايمان المسلم .. اجتماعيات
كنت اموووووووووت عليها واهي بعد تموت علي واختارتني من ضمن البنات الي قدموا الملحمة الغنائية (ابناء الكويت) مع الفنان شادي الخليج


المتوسط :
* ابلة مها .. لغة عربية
مدرسة مصرية جدا حبوبة وطيبة .. كانت تلبس خمار وكان شكلها جدا مميز

مادري ليش ابلات المتوسط ما اتذكرهم وايد :(


الثانوي :
* ابلة بدرية الحبيل .. علم نفس
هالابلة قمة اهي اللي حببتنا في مادتها وخلتنا نييب فيها امتياز مع ان المادة كانت دسمة وكلها حفظ
بس صج اذا حبيبتي الابلة كل شي يصير سهل ويتيسر :)


* ابلة جميله دهراب .. تجاري

اذا في مكان فوق القمة فهذي الابلة تستحقة .. اكثر ابلة اثرت فيني في مراحلي الدراسية كلها في داخلي احمل لها حب كبير وليلحين اتذكرها بالخير اذا تذكرت ايام الدراسة
كانت تعلمنا على طريقة دعينالها وايد لما رحنا الجامعه .. علمتنا على سرعة الكتابة وكانت تعطينا اخر حصتها 5 دقايق تملينا وتطلب منااا السرعه بالكتابة وماتعيد اللي تقولة .. تقولنا باجر دكتور الجامعه ماراح ينطرج بيقول اللي عنده وبيمشي وصدقت بهالحجوة وماتتوقعون شنو استفدت من السرعه بالكتابة ايام الجامعه
انا وياها ليلحين على تواصل عبر SMS ولله الحمد بس ليلحين ماعرف اقولها غير ابلة جميلة :)

ابلة جميلة تبارك الرحمن صارت الحين اشهر من نار على علم درست وكملت ابلتي الطموووحه

وصارت استشارية ومعالجه بالطب البديل .. ربي يوفقها

وهذا سايتها للإستفاده

http://dhrab.com/

* ابلة صباح .. لغة عربية

ابلة مصرية حبوبة وطيبة ودرستني انا واختي

* ابلة منى المزيني .. تجاري

حبوبة وطيبة وستايل بعد .. كنا ننطرها كل يوم علشان نشوفة شكاشخه فيه :)

* ابلة فريال وابلة فريال .. تربية بدنية

ابلات مصريات واثنينهم فريالات ياحلووووهم قشطة

وحده كنا نسميها فريال والثانية كنا نسميها فريال فراويلة علشان نفرق لووول

* ابلة فريدة .. فرنسي

يحليلها خذينا عندها كورس واحد وييناهاااااا .. مغربية وتتحجى عربي كلا فرنسي واحنا بصوب والفرنسي بصوب مالقطنا الا الاحرف والارقام وبونجووور وميغسي وسفا بيااا لوووووووووووول

* ابلة عناية الجاسم .. تجاري

حبوبة تحسينها ام مع انها جاده شوي .. بس كانت تذكرني بأمي مادري ليش :)

* ابلة مريم الانصاري .. تجاري

وااااي هالابلة قمة الطيبة .. اصلا الطيبة طلعت منهااااااا حبااااااااااااااابة يحلوووها

الجامعه :

* دكتورة منيرة الرشيد البدر .. لغة عربية

هالدكتورة ام .. ياحلووووها بس وقت المحاضرة محاضرة جااادة وتحب اللغة بس بمكتبها اميمة يازينهاااا

* دكتورة حصة الرفاعي .. لغة عربية

دكتورة جادة وعصبية لكن اللي يعرفها عدل يحبها لأنها داخل غير وقلبها ابيض

* دكتور ابراهيم محسن .. لغة عربية

عمري ماراح انسى هالدكتور .. دكتور سوري يدرس نحووو مشاء الله متمكن بدرجة مو طبيعية ويفهم بدرجة مو طبيعية انا اللي ما اواطن النحووو حبيت محاضراته .. الله يطول بعمره

* محمد النجار .. لغة عربية

دكتور مصري .. كان طيب وحبوب وكل طلبة العربي يحبونه الله يرحمه

وايد ضاق خلقي لما سمعت بوفاته

اللهم اغفر لمحمد النجار وارحمه واعف عنه واكرم نزله ووسع مدخله واغسله بالماء والثلج والبرد ونقه من الخطايا كما ينقي الثوب الابيض من الدنس وابدله دارا خيرا من داره واهلا خيره من اهله وزوجا خيرا من زوجه وادخله الجنه واعذه من عذاب النار ومن عذاب القبر

* دكتور المنصف الشنوفي .. اعلام

تحفة هالدكتور.. ريال عووود بس نكته يحليله

* دكتور صلاح الناجم .. لغة عربية

دكتور شاب طموح كان جدا محترم وفاهم بشغلة الله يوفقة

ادري اني نسيت مدرسات وايد يستحقون اني اذكرهم بس ماعليه العتب على الذاكرة والكبر شين :P


الجمعة، 4 أبريل 2008

My Day :D

اليوم كان يوم جميل بالنسبة لي
طلعت غيرت جو واستانست وايد مع بنت خالي وتوأم روحي
بدت الطلعه الساعه 3:30 واخترنا نتغدا في ابل بيز مشرف
الصراحه مكان هادي وحلوو وابساطة حصلنا طاولة
وهذي لقطة خارجية من ابل بيز مشرف

وهذي لقطة ثانية من داخل
مشاء الله المكان راهي ماتوقعت جذي

وبدينا طلبنا بحلقات بصـل وكانت روعه
طلبي كان ستيك مشروم ويل دن


وهذا طلب بنت خالتي جيكن فاهيتا


وختمناها بمولتن كيك عجيبة تشبه المولتن مالت شيليز


بعدها رجعنا البيت ريحنا والساعه 5 طلعنا

تطابقت الافكـار بيني وبين بنت خالي واخترنا نروح ايكيا وبعدها نتمشى في الافنيوز


بعد التمشي في ايكيا وشرينا شوية اغراض
بنت الخال خاطرها في Necklace
وقالت خنشوف
واختارت هال Necklace
عليج بالعافية مرمووووورة



بعد اللوية والتمشي بالافنيوز قررنا نشرب شي في ستاربكس
واخترنا موكاااا فربتشينوو


وبعد طول انتظار و60000 مره اروح توب شوب
حصلت تكرمون الجوتي اللي ابيه

وطلعتلي ببديات من H&M
وتكرمون دلاقات عجبوني الوانهم


واخيرا تعشيت الساعه 11 حلووووم وعصير كوكتيل
من مطعم نادي اليرموك

هذا كان يومي الممتع وان شاء الله استمتعوا معاي بالصور
انطروني بيوم ثاني احلى ان شاء الله

الخميس، 3 أبريل 2008

حصن المسلم

حصـن المسلم


كتاب مختصر جميل للأذكـار خفيف يحمل الى كل مكان فلا ينقطع ذكر الله سبحانه وتعالى

بسم الله الرحمن الرحيم

" والذاكرين الله كثيراً والذاكرات اعد الله لهم مغفرةً واجراً عظيماً"

سورة الاحزاب .. آية 35

جعلنا الله واياكم من الذاكرين لله عز وجل في كل وقت

ونسأل الله جل وعلا جنة الفردوس ورؤية وجهه الكريم وجوار نبينا محمد صلى الله عليه وسلم

الأربعاء، 2 أبريل 2008

ChOoWy GoOwY


اليوم الساعه 1 طق براسي اطلب من جوي قوي لي ولليهال والخوات

فتحت السايت وتنقيت وقلت يالله يا بنوكة دقي رقمهم 2620011
ويكلمني الهندي واطلب منه جوكو لوكو و جوي ارجينال وجوي توفي وقلت مره وحده
انجرب البراونيز
والساعه 7 ويدق جرس البيت واييبون الطلب




النوع الاول ChOowY Original


النوع الثاني ChOcO lOcO



والنوع الثالث ChOowY tOffee



ونيي الحين حق ال BrOwnie BiteS



الصراحه كل شغلهم لذيذ وكل شي الذ من شي اول مره بحياتي اذوق كوكيز ترف ولذيذ جذي

انصحكــم فيه

وهذا السايت