الاثنين، 30 أغسطس، 2010

السبت، 28 أغسطس، 2010

قرقيعان وقرقيعان

المفروض اكتب البوست وقت القرقيعان بس انشغلت شوي
طبعا القرقيعان عادة تراثية حلوة يحتفل فيها اليهال (الاطفال) ليلة 13, 14 و15 من شهر رمضان
وهم يفترون ويطقون البيبان يسألون عن القرقيعان (حلوى ومكسرات) وينشدون الانشودة الشهيرة
قرقيعان وقرقيعان بين قصير ورميضان
عادت عليكم صيام كل سنه وكل عام
يالله تخلي ........... يالله تخلها لامها
عسى البقعه ماتخمها ولا توازي على امها
وتختلف مسميات القرقيعان في دول الخليج .. قطر يسمونه قرنقعوه والبحرين قرقاعون والقرنقشوه في عمان :)
مع تطور الايام بدا حتى القرقيعان يتطور وبدوا الكبار يهتمون فيه ويتفننون فيه اكثر من الصغار :)
هالسنه وصلني اكثر من قرقيعان
هذا قرقيعان هيونه الحلوة .. راقي وفكرته حلوة مثلها
مكسرات
جاي احمر
شوكليت Läderach
زعفران
سكر على قفشة
وجوكليت وبسكوت على قفشة
قوري
قرقيعان بروكي .. علبة راقية وعليها صورة مبارك الزوغه :)
وهذا قرقيعان فطامي المزيونه .. نـــــازك وحلو
قرقيعان مريومة الجميلة .. قوري مزركش شحليله
واخيرا قرقيعان جنى وغلا .. الككاو من جنيف والجيس مقسم وفكرته يديدة :)
عساكم تعودووونه يارب وعساها عادة ماتنقطع يارب وربي يخليلكم عيالكم ويفرحكم فيهم :*****

FONDUE melt away

امس كنا رايحين الصالحية ونسينا انه يوم اليمعه والمحلات تسكر :/
عاد قلنا واصلين واصلين خنجرب Fondue melt away
طلبنا الفوندو الكويتي اللي منزلينه خاص بشهر رمضان المبارك
عبارة عن
- كيك التمر
-قرص عقيلي
- كرات التمر
- بسكوت الكليجة
والفوندوو سوس
- جوكليت
- كراميل وتمر
- كاستر

ونوتيلا براوني .. وايد لذيذة
تلفون : 22996424/22996425
FB
Link

حب الرقي الضاحك !!

وصلتني صوغه من البحرين عبارة عن حب رقي
اسمه حب الرقي الضاحك لأن الحب مفتووح

حسيت خوارة مو كلهم مفتحين والطعم عادي مو ذاك الزود الحب المصري احلى :)
مشكورة مريم على الصوغه

الجمعة، 27 أغسطس، 2010

My Mold .. Mini you

تذكرون البوست اللي كتبته عن ال mini you
اول امس وصلني بوكس من فيدكس
مغلفين ال mold عدل علشان ماينكسر
شرايكم فيني ههههههههههههه
ترى كلش ماتشبهني تحسفت على ال 54 دينار اللي قطيتهم عليها
بس تبون الصج ادري مالي شبيه رب الكون سبحانه خلق Pink وحده مايقدرون يسوون مثلي حتى تمثال ;)

قرقيعان المولتن من Chocolateness

Chocolateness عرضهم للقرقيعان يديد وحلوو
عبارة عن لوقووو تختارونه مع صورة او بس اسم الياهل يحطونه على صحن المولتن كيك
سويتها مفاجأة بيمعتنا وحطيت صورة بنت اختي الزبوووطة

وهذا قرقيعان لولو المولتني :)
وايد استانسوا عليه
تلفون : 99906890
FB Link

Chocolate & More

كل ما صار خاطري بككاو حلوو او بييني احد احب اطلب جوكليت من جوكليت اند مور
ككاوهم حلووو وغريب
خصوصا بوكس السامبلز
فيه من كل نوع حبة وحده :)
هذا الككاو :)
وايد لذيذ اللي ماجربة لازم يجربة
تلفون : 99282829
Site Link

الثلاثاء، 17 أغسطس، 2010

مسلسلات رمضان 2010

هالسنه عندنا طفوووح بالمسلسلات
كان اختياري اني اتابع مسلسل اميمة في دار الايتام وزوارة خميس
ولكن ساعات احوووس بالريمووت واشوف لي ربع ساعه حلقة مني ونص ساعه حلقة مني
ملاحظاتي عن اول ست حلقات من جم مسلسل
زوارة خميس
صج انه يونس وفيه بعض الاشياء الواقعية بخصوص حياتنا اليومية لكن اغلب الاشياء مبالغ فيها
- اول شي صعب بهالزمان تكود كل هالاوادم في بيت واحد !! اربع جناين وفي بيت واحد وعلى قلب واحد تقريبا مستحييييييييل
- وحدة يخونها ريلها وكل شوي تكتشف انه يعرف وحده وبالاخر يقولها رغبة جسدية !! هل ارضى اني اشوف ويهه اصلا !! ولا كأن مسوي شي كل شوي مسامحته
- ملاك شدعوه عليج الحرمه الديَنه كل شوي ترمش !!
- 1000 دينار بالنون !!! بيت قارون لا وسوار كارتيير قيمته فوق ال 1200 دك ينحط بالنون !!!
- خاتم شوبارد ب 700 دك بالشوربة ماكووو حيلة ثانية ما عورة قلبه لما شاف الخاتم متلغمط واهوو يديد !!!
- مرام 24 ساعه تسريحه مو لي هالدرجه عاد
- لمياء طارق اول شي تزف الوقح ريل حماتها وتالي ببساطة تاخذ مفتاح الشقة !!!
في وايد ملاحظات على هالمسلسل والدليل برودكاستات ال BB
اميمة في دار الايتام
وايد حبيت هالمسلسل وعجبني اكثر من زوارة خميس بس هم لي ملاحظات
- معقولة ملجأ او دار ايتام بس فيها هالعدد القليل !!!
- معقولة المسؤول عن الدار بس 3 وكل شي عليهم الاكل والتنظيف و... و ....... الخ
- الجناط واللبس والموبايلات والبذخ معقولة عيال الدار جذي ينصرف عليهم ؟؟؟؟
ليلة عيد
مع اني ماتابعتة بس حبيته وناوية اشوفه بعد رمضان ان شاء الله
كريمو
احسه حق فئة معينه اهم اللي استمتعوا فيه اكثر اقصد اخواناا العيَم
بالنسبة لي ماحبيته وايد الفطين مع انه عادي بس كان احلى
ساهر الليل
شفت جم حلقة بس وقررت اتابعه بعد رمضان ان شاء الله
البيت المسكون
ماله هدف ولا معنى مووووولية
مادري ليش المسلم يمووووت على سوالف الينانوه والاشباح
انتواااا شنو ملاحظاتكم ؟؟؟؟؟؟؟ :)

الجمعة، 13 أغسطس، 2010

امساكية الاطفال من كل لحظة

لحظة من فضلك مسوين طريقة حلوة لزباينهم من الاطفال علشان يشجعونهم على الصيام
امساكية حلوة
وتحت كل يوم من الشهر يصومه الياهل هدية :)
سألني عن عدد اليهال وخذيت 2 لعيال اختي
هذا بطلنا نصوري اول يوم صام اسم الله عليه وفتح الامساكية اول يوم والهدية كانت حلاوة
فكرة حلوة الصراحه ويعطيكم العافية (كل لحظة)

JUICE Factory

محل يديد للعصير في الجابرية اسمه جوس فاكتوري
مكانه على امتداد الشارع اللي فيه مستشفى رويال حياة من الخلف
طلبت عصير رمان مشاء الله اينن باااارد وحلوو مو مر
ونزاكه يايبين لي معاه ككاوة
الحلووو بمنيووهم انه على اسامي منولة وفطومة وصبا وشيوخه وعبود وحمني وغيرهم
بس ضاق خلقي اسمي مو موجود :/


الأربعاء، 11 أغسطس، 2010

سبووووع مصري

امس كنا معزومين عند رفيجتي على سبوووع بنت اختها على الطريقة المصرية
اول مره احضر سبوع واصلي عند مصريين :)
اول شي يابوا الابريق الفخار وفيه شمعه وتحته لوبا وعدس


ووزعوا علينا الشموع

هذي شمعتي :)
يابوا البيبي يحلوها وقمنا ندور على الابريق ونغني (حلقاتك برجالاتك حلقة دهب بوداناتك يا رب ياربنا تكبر وتبقى ادنا)
ويحذفون العدس واللوبا الجافة على الام والبيبي
بعدين ايبون الهاون ويطقطقون فيه والام تمر على البيبي 7 مرات ووحده تبخرها وتقول "الأولى بسم الله والتانية بسم الله والتالتة الصلاة على المصطفى ابن عبد الله"
بعد ماتخلص ال7 مرات يحطون البيبي بالمنخل وينخلونه وعليه ويقولون له اسمع كلام امك متسمعشي كلام ابوك واسمع كلام فلان ومتسمعشي على كلام فلان لووول وناسة
وبعد مايخلصون ويصفقون وايببون يوزعون الحلاو والملبس والتوزيعات على اليهال والمعازيم :)

وايد استانسنا الوضع وايد كان حلووو .. ثانكس نسرين والله يخليلكم ارتال وتعزمونا على عرسها يارب :*

fashcode

وانا اتمشى بالافنيوز شفت هالمحل اليديد (فاش كود)
طريقته جنه معرض واعتقد تابع ل I Love Souk

عندهم اكثر من نوع من هالجناط يضحكوون :)



وهالتيشيرتات العجيبة
عليهم اغاني وامثال وكلمات كويتية شبابية


مبارك عليكم الشهر

كل عام وانتوا بخير ومبارك عليكم الشهر

الاثنين، 9 أغسطس، 2010

سوريني زيت نخالة الأرز

وصلتني اليوم هدية من شركة البتيل الوطني
زيت نخالة الارز سوريني
هو زيت يديد اول مرة يطرح في الاسواق الكويتية وصحي جدا للطهي
كل الشكر لكم شركة البتيل على الهدية وسرعة توصيلها :)
فوائد الزيت كثيرة :
* مكرر بطريقة صحية
* خالي من اي مواد او اضافات كيميائية
* حاصل على شهادة جودة التصنيع من HACCP و GMP
* نسبة الامتصاص اقل من الزيوت الاخرى
* يقلل نسبة البروتين الدهني منخفض الكثافه
* يساعد على الوقاية من امراض القلب والاوعية الدموية
* يقلل مستويات الكولسترول
* نسبة احتراق الدهون مثالية للقلي
* مصدر هام لفيتامين هـ ومقاوم للاكسده
* يوصى به لتوازن الدهون احادية ومتعددة التشبع
* حاصل على جائزة التذوق من المعهد الدولي للمذاق والجودة - بلجيكا
للطلب : 97544190
FB Link
Site Link