FalaFel Nadia

مطعم فلافل يديد توه فاتح في مول 360

قريت عنه في النت ووايد ناس مادحينه

امس كنت في المول مع رفيجاتي وقلنا نجربه

خذيت 2 علبالي نفس الصمون اللي بره طلعت الصمونه كبييييرة يكفي وحده وتزيد بعد

تقدرون تختارون شنو داخلها خلطة بالاعشاب ولا السمسم ولا الفلفل واذا تبون رمان ولا نعناع ولا بيديان او غيرة

الطعم لا بأس به يعني 70%

السعر مقارنه بمطاعم الفلافل طبعا over

الصمونه عندهم تقريبا دينار وشوي طبعا على حسب اللي فيها يزيد السعر او ينقص

فنقش الضفدع !!!

اختي قبل فترة شارية ضفدع شكووو مادري لوول واليوم يايتني ويايبته مسكين ولا مفنقــش بالبوكس وعليه وصاير ويهه جنة بريعصي

عظم الله اجرج بطوووط خخخخ

Happy Birthday Nassory :*

اليوم عيدميلاد ولد اختي نصوري حياتي يكمل 7 سنوات

كل عام وانت بخير نصووووري وعقبال مليووووووون سنه :***

عيدكم مبارك

غدا الاحد اول ايام عيد الفطر السعيد

كل عام وانتم بخير وعيدكم مبارك

بوخرشد والخطر معهم

كلكم تعرفون المذيع المشهور محمد خورشيد (بوخرشد)

لما استضافووه برنامج تو الليل اسألووه اذا مثل من قبل ولا لأ بما ان خـاله الفنان الكبير حسين عبدالرضا وعمه المرحوم غريد الشاطيء

جان يقول مثلت مشاهد بسيطة مع عبدالله السلمان في مسلسل الخطر معهم

انا مسجله المسلسل لأن ولد اختي يحب الشرطة والحرامية وهالسوالف تدروون بعد صبيان يحبون الاكشن
امس ولد اختي حاط الشريط بفيديو الصالة وحد الاندماج جان اقعد معاااه جان يطلع ابووويهي بوخرشد لوول
عاد قلت لازم تشاركوني وتشوفون بوخرشد ايامها

McDonalds Soon in Reggai

ماكدونالدز قريباً في الرقعي

Minii BasBosa

السويت اليوم راح يكون ميني بسبوسة

وان شاء الله يعجبكم :)

المكونات

كوب سكر

كوب سميد

كوب زيت

كوب جوز هند مبشور

قفشة بيكنج باودر

2 بيض

رشة فانيلا بودر

1 روب

لوز مبشور

شيرة

نخلط كل المكونات مع بعض

نصبهم في ورق الكب كيك الميني

ندخلهم الفرن على درجة حرارة 170

بعد مانطلعهم نحط حق كل بسبوسة نص قفشة شيرة ونزينها في لوز مبشور او فستق على حسب اختياركم :)

وعليكم بالف عافية

Starbucks ice cream in sultan center

thanx shoug :>

توست الدياي بالمشروم والكريمة

اليوم سويت اكله بسيطة ولذيذة

خذيتها من كتاب المطاحن اليديد

المكونات

صدر دياية

مشروم مقطع

بقدونس

كزبرة

مكعب ماجي خضار

فص ثوم مهروس

كوب بصل مقطع

جيس توست

كريمة سائلة (KDD الزرقة)

موزريلا

بارميزان

اوريغانو

زيت زيتون

جبن قلاص (كرافت)

الطريقة

نقطع الدياي الى مكعبات ونزهب البقدونس والكزبرة مغسلين ومقطعين وجاهزين

نسخن قفشتين زيت زيتون ونحمر فيهم البصل مع الثوم المهروس لما يتضج شوي بعدين نحط مكعب الماجي

والكزبرة والبقدونس والمشروم بعدين الدياي ليما يستوي

ويصير شكله جذي

نقطع اطراف التوست ونحطة في بايريكس
نحط خلطة الدياي وفوقها نصف التوست ونكرر هالسالفة على حسب عمق البايريكس

اخر طبقة توست تصير جذي

نخلط الكريمة مع قفشتين جبن قلاص (كرافت)

نصبه على التوست ونرش فوقة البرميزان والموزريلا والاوريغانو

وندخلة الفرن على حرارة 180 لمدة 10 دقايق او لما يتحمر الجبن

طبقنــــا وقت التقديم هذا شكله
والطعم لذيـــــــــــــــــــــــــذ

وعليكم بالف عافية :)

Perrier

Perrier

طلعوا علبة يديدة مثل طريقة البيبسي وربعة :)

GARLIC CHEESE BREAD

قبل امس اشتهيت GARLIC CHEESE BREAD

شريت المكونات وبديت اجهزة للفطور وقلت اصور لكم هالاكله الحلوة السريعه

المكونات

باجيت فرنسي

3 فص ثوم كبير

3 قفشات اكل زبدة

موزاريلا

نهرس الثوم
نضيف عليه الزبدة وندخلة المايكرويف لما تذوب الزبدة ونقلبة بالقفشة لما يختلط مع الثوم

نكون مجهزين الباجيت .. مقطعينه وحاطينه بصينية الفرن

نحط عليه خلطة الثوم مع الزبدة

نحط فوقة الموزاريلا وندخلة الفرن بدرجة حرارة متوسطة

وهذا شكله النهائي :)

وعليكم بالعافية :)