اول عيد ام بدون امي :~(

اول عيد ام يمر ومانحتفل بالغالية

من اشوف اي اعلان عن عيد الام بدون شعور دموعي تنزل

والذكريات تمر في بالي

السنه اللي فاتت بهاليوم امي الله يرحمها كانت في المستشفى وكنت نايمة عندها على سليبنج باق على الارض بالعناية المركزة بالهادي

صارت الساعه 12 جان تقولي مادزيتيلي مسج مثل كل سنه حق عيد الام الساعه 12 قلتلها يما كاني معاج ماله داعي المسج وخنقتني العبرة وقمت ابجي وقامته نفسي بالمخده ودزيت لها المسج

امس بالليل كلمتها ترن في اذني (ليش مادزيتيلي مسج؟)

يمااااا ولهانه عليج ونفسيتي تعبانه على فراقج

كنتي امي ورفيجتي واختي وحبيبتي وعمري ماراح انساج وبكل المواقف اتذكرج

بس ادري والله يا يما انج عند اللي احسن مني عند ربي اللي خالقني وخالقج عند اللي ارحم من الام على ضناها

وادري بعد انج صفحه بيضا وربي بيعطيج على نيتج وادري انج مستانسة بمكانج

يماااا احبج وبيظل دعائي لرب العالمين انه يسكنج الفردوس الاعلى دايم على لساني الى وفاتي

الله يجمعني وياج بجنة النعيم يارب العالمين

مجلات مجلات مجلات

امس كان عندي حملة تنظيف في البيت

انصدمت لقيت مع الدثرة 6 كراتين كبار مجلات

توني ادري اني مينونة مجلات !!!!!

حل مجلس الأمـة

زهبوا جناسيكم للانتخابات الياية

بس هاااااااااا لا تعيدون الغلط وتنتخبون نفس الاشخاص ولا لاطبنا ولا غدا الشر

مطعم Rice

اخترنا انتغدى انا واختي بمطعم يديد بالافنيوز اسمه رايس

عنده اكل كويتي وهندي وصيني وغيره بس الاهم ان كل الوجبات اللي عنده فيها عيـــش

طريقة تقديمهم بهالصينية .. الجدر للعيش وبادية للمرق ومعبوج وسلطة مع صحن الزبوناول شي يابووو لنا خبز يابس مع زبدة
طلبنا Cheese Roll وايد لذيذ

وهذي سلطتهم

وطلبي جيكن بيتر .. وايد حلوو بس الدياية شوية عردة

وعيش زعفران

ولازم بيبسي وليمون

وهذا مادري شنو بالضبط مو معبوج لأنه مو حار طعمه وااااااااايد حلوووو عجبني

بعدها يابولنا جاي FREE

وطلبت اختي عصملية .. دمار وايد لذيذة الصراحه

المطعم يستحق 85%

مطعم رايس في الافنيوز البارت اليديد بجانب ابل بيز تقريبا

ســوار العقــال

الاسبوع اللي طاف طلعت مع رفيجتي وكانت لابسة شي غريب في ايدهااا

سوار على عقال عنونووووو

عجبني يونَس غريــب

قالتلي طالبته من سايت Pick your tag

عاد دخلت وطلبت لي انا وخواتي :)

ومشاء الله التوصيل سريع .. طلبته الصبح ووصل المغرب

السعر : 3 دك + التوصيل : 1 دك

السايت : http://www.pickyourtag.com/Products.aspx?sub=25&d=551&cat=1

Choowy Goowy Soon in Avenues

قريبا Choowy Goowy في الافنيوز ال Food Cort مكان ستاربكس

ENGLISH CAFE avenues

اليوم قررنا انا ورفيجاتي نجرب ال English cafe اللي فتح بالافنيوز القسم اليديد

طبعا كلكم تعرفون الانجلش كافيه تبع فندق الشيراتون

الصراحه حاطينه بمكان هادي بعيد عن لوية الافنيوز

وانتوا قاعدين فيه تحسون فعلا جنكم في بيتكم قنفات وشي عدل وخدمة روووووعه

على قولة رفيجتي انتي طلباتج طلبات عيوز هههههه

طلبت شاي نعناع وبلاك فورست .. الجاي عجيب بس البلاك فورست متروووسة كريمة ماشفت فيها ريحة الكيك :(

وحده من رفيجاتي طلبت تراميسوو
والثانية طلبت جوكليت موس

ساعتين مروا علينا في الكافيه ماحسينا فيهم مشاء الله

انصحكم تجربونه وبقوة بعد بس حلاته يمعه وسوالف مو قعدة على الماشي

مكانه في القسم اليديد صوب كينزو والاسطورة واوميغا

PAUL Breakfast

يوم السبت كنا رايحين مجمع الكوت الصبح وقلنا نتريق في PAUL

الخدمة كانت بطيئة جداً

طلبنا جاي حليب وكان على قولتنا ماي مايوووه ماينشرب طعمه مو حلووو لما قلنا للجرسون اللبناني قالنا جذي طعم الحليب الفرنسي

قلنا له خلاص نبي عصير برتقال يابوو لنا عصير البرتقال حااااااااااار وطلبنا ثلج والى يومكم ماوصل الثلج !!

طلب اختي اومليت ميكس كان طعمها لذيذ

وطلبي اومليت بيتزا .. من كبرها يتشاركون فيها 3

بس اللي خرب البيض مع انه حلوو .. ماكو خبز عربي ماعندهم الا الصمون الفرنسي اليابس

اللي بيروح لهم ياخذله جيس خبز معاه لوول

صج طعم البيض حلوو لكن ماراح اعيد التجربة في هالمطعم مره ثانية

بكل فخر .. صنع في الكويت

تزينت بعض ارفف مركز سلطان التي تجتوي على منتجات صنعت بالكويت بتاق على علم الكويت يحمل عبارة

بكل فخر .. صنع في الكويت

العيد الوطني في لندن

اول امس رفيجتي في لندن دزتلي هالصور بالايميل
محتفلين بالعيد الوطني هناك واهي مسوية بسكوت على علم الكويت وزعووه في الجامعه
تسلم ايدج ام نصوووور
وان شاء الله تحتفلين معانا السنه الياية الكويت :)

وكل عام وكويتنا بأمن وأمان يارب

LGAIMA sweets

كتب الاخ يوسف ( بلوق Some contrast ) عن بسبوسة لقيمة

http://somecontrast.com/2009/02/23/lgaima-sweets/#more-4012

وبما اني من عشاق البسبوسة الناشفة قلت اطلب من البسبوسة حق يمعتنا

دقيت طلبت وقلت لهم يوصلونها بال 10 الصبح ومشاء الله الساعه 10 بالضبط السواق عند الباب

البسبوسة وايد لذيذة مشاء الله والدرزنين اللي خذيتهم خلصوا كلهم :)

يعطيكم العافية LGAIMA sweets

ريوق فرايديز

انضم مطعم فرايديز للمطاعم اللي تقدم الافطار في المارينا كرسنت فقط

25- 26 فبراير

كل عام وانتوا بخير وكويتنا الغالية بأمن وأمان وتطور يارب

والله يجعل ايامنا كلها اعياد

P2BK 2

امس كان الافتتاح لمعرض P2BK 2 في الراية

رحت الساعه 7 وشوي بس ماتوقع الزحمه جذي شي خيالي بالغصب مشينا بالممرات

حتى ماقدرنا نشوف شي على راحتنا

الكرووت والجياسة اهم شي لووول

وكانت فرقة المجلي موجودة مشاء الله خوش اغاني

ايوااا الطمبورة

شكرا eshop عطونا جيس فيه جنجفة وكلينكس وقلم وساين بيبي اون برود وستيكرات

وهذي الكوكي المشهورة من سايت Pick ur tag

You will have an exciting business adventure يمكن ليش لأ :)

ختامها حلينا بهاجن داز وطلعت من المعرض بتراجي واكسسوار موبايل :)

بس يعطيهم العافية كل اللي مشاركين من شباب وبنات الكويت كان شغلهم بروفيشنال يستاهلون تشجيع

keep going

تقرير سفرتي الى دبي

شلوووووووووونكم ؟ ولهانه عليكم من زمان مانزلت بوست

كنت مسافرة دبي ونزلت تقرير في منتدى العرب المسافرون

اللي يحب يتابع التقرير هذا اللنك

http://travel.maktoob.com/vb/travel253901/

Fire Fire

اليوم كنت مارة مركز سلطان وشفت دخان كثيف على شارع الخليج بإتجاه المركز العلمي بس الناحية المقابلة له تقريبابعد ماطلعت من مركز سلطان كان الدخان اخف واصوات سيارات الاسعاف والشرطة والمطافي شغااالة
لما قربت صوب الموقع اتضح انها دعمه وسيارة محترقة لكن من كثافة الدخان ماشفت عدل

سنوات الضياع !

خلصنا من نور نزلوا المسلسل التركي سنوات الضياع

ب 89 دك

المكان : كارفور

مركز الدولية لرعاية الخيل

قال رسول الله صلى الله عليه وسلم «علموا أولادكم الرماية والسباحة وركوب الخيل»

ومن هذا المنطلق قلنا خل نبدي نعلم ركوب الخيل لولد اختي اللي عمره 7 سنوات

بعد بحث عن المكان المناسب اختارت اختي مركز الدولية لرعاية الخيل

12 حصة تعليم = 60 دينار

كل حصة مدتها 30 دقيقة

ياخذون الاطفال من 6 سنوات وفوق فقط

هذا المركز من بره

هذا الدرس الاول يعلمونها شلون التوازن على الخيل

التوازن طبعا بدون لا يمسكون لجام الخيل :)

وهذا المدرب يوجه اليهال

شوفوا شلون التدريب :)

ماقصروا ضيفونا بجاي

وخلص الدرس الاول

يازين خيالنـا واهوو ماخذ الخيل يردة الاسطبل

طبعا بالمنطقة في محلات لبيع لوازم الفروسية

احنا خذينا الاغراض من محل الوطنية وهي عبارة عن

* القبعة 10 دك

* البوووت 15 دك

* العصاة 2 دك

* البنطلون 17 دك

مشاء الله لوازم الخيل ماتوقعت هالكثر

ان شاء الله استفدتوا من هالبوست .. واللي عنده يهال ودوهم يتعلمون ركوب الخيل ترى حدهم يستانسون ولدنا حده مكيف على السالفة :)

رقم تلفونهم : 24755000