حلوو الكيك البارد

باجر عندنا قريش بالدوام وزهبت لي طبق خفيف وسهل عبارة عن حلوو بارد

المكونات:

3 جياس دريم ويب

1ونص قيمر

3/4 كوب حليب بارد

3/4 جبنة فيلاديلفيا

كيكة فانيلا جاهزة

رول كيك امريكانا

ككاو باودر

1/2 حليب محلى نستله

نحلط الحليب و2 دريم ويب وقيمر ونص الفيلاديلفيا
نرص الكيك في البايركس وعلى الاطراف نقصص الرول ونحطة
انا رشيت شوية ككاو مفتت

نحط الخليط فوق الكيك

نرد نحط كيك مره ثانية وفي ناس يحبون يحطون بسكوت

ونرجع نخلط 1 دريم ويب ونص قيمر وربع الفيلاديلفيا وقفشتين كبار ككاو بودر ونص حليب محلى ونحطهم فوق طبقة الكيك الثانية وندخلها الفريزر لمدة نص ساعه تصك وبعدين ندخلها الثلاجه

بعد مازينتها :)

وكل عام وانتوا بخير ومبارك عليكم الشهر :)

بسبوسة البقصم

من زمااااااااااان ما كتبت وصفة ولا دشيت المطبخ

قبل جم يوم ذقت عند رفيجتي بسبوسة ولا اهي بسبوسة وعجبتني وايد انصدمت لما عرفت انها بقصـــــــــــــــــم !!

وقلت شي يديد وغريب يستاهل Post حق احلى زوار للبلوق

الله يسلمكم المقادير

5 بيضات

بيكن باودر

فانيلا

بقصم

شكر

زيت الذرة

فستق ناعم

الطريقة :

نخلط ال 5 بيضات وقفشة صغيرة فانيلا في ماعون

باقي المقادير بيكون المعيار اهوو جبن قلاص وسط

نفتت البقصم ونحتاج قلاص واحد

وقلاص شكر

وقلاص زيت

وقلاص فستق ناعم وقفشة وسط ممسوحه بيكنج باودر ونخلطهم بالقفشة

ونضيف عليهم خليط البيض ونستمر بالتقليب لما يصير جذي

نكون مزهبين بايركس مدهوون ونحط الخلطة

ندخلها الفرن على درجة 180 تحت بس لمدة نص ساعه وبعدها 5 دقايق من فوق وديروا بالكم لأن فوق بسرعه يتحمش

بعدها نطلعها ونخليها تبرد على راحتها

نرش عليها سكر بودر ونقصصها ونقدمها

وعليكم بالف عافية

شكرا افنان على الوصفة السهله :*

اقراص العسل

من فترة كنت اتابع برنامج نايجيلا لاوسون في قناة فتافيت وشفتها تسوي وصفة سريعه وسهله وحسيتها حلوة

وهذا رابط الوصفة في موقع نايجيلا

http://www.nigella.com/recipe/recipe_detail.aspx?key=H&rid=107

مع الايام وانا احوس في البلوقات شفت الاخت lazy dazy مسوية الوصفة وهذا الرابط

http://ladylazydazy.blogspot.com/2009/10/blog-post_11.html

اول امس كنت فاضية وقلت هذا وقتها

المقادير

نص كوب سكر (كاستر شوقر)

4 قفاش اكل عســـل

1 ونص قفشة بيكربونات الصوديوم

نحلط السكر والعسل على النار لما يذوووب السكر
نطفي النار ونحط البيكربونات ونخلط بسرعه

تصير الخلطة جذي

نكون مزهبين ورق الزبدة على ماعون مسطح ونحط الخلطة بسرعه عليها ونخليها على الطاولة او اي مكان بالمطبخ

ننطر ربع ساعه او اكثر شوي بتكون الخلطة يابسة ونكسرها

بتصير جذي

وعليكم بالعافية